遠征極地係好多青年人嘅夢想，有新一代蝶后之稱嘅港隊新星梁雅媛（Rachel）今年就參加咗仁愛堂與野外動向合辦嘅北極考察之旅，下月三日跟住專家展開為期十七日嘅極地探險。
今年只有十六歲嘅Rachel話，犧牲咗香港國際公開游泳錦標賽嘅機會，先可以去到呢趟極地之旅，不過佢並唔後悔：「一生人可能得一次機會去北極」。今次極地探險之旅共有二十二人，連中秋節都要喺旅程中度過，Rachel話會帶埋燈籠、月餅、燈謎等，同當地原住民交流文化，仲會睇冰川嘅融化情況。
梁雅媛寧願放棄參加香港國際公開游泳錦標賽，都要到北極考察。
