政壇：搞搞政：林健鋒廢噏挺警

警權無限大，搞到香港掀起一片不滿人權被出賣之聲。特區警察喺國務院副總理李克強訪港時封橋封路、拉人禁錮樣樣做齊，民怨沸騰之際，經濟動力立法會議員林健鋒Jeffrey卻覺得警方嘅行動小兒科，佢尋日出席個電台節目時，竟然話「相比起美國機場嘅安全檢查，香港情況只係小巫見大巫」，佢到底知唔知自己講緊乜㗎？唔通香港小市民係恐怖分子咩？

Jeffrey尋日出席一個電台節目，講到出席李克強有份致辭嘅十二五規劃論壇前，佢都經過兩次搜身時，仲話，香港同美國比只係小巫見大巫，此言差矣！美國總統落區食熱狗，普羅市民照樣可以坐喺附近，日常生活無受影響，不過香港警察神經過敏，升斗市民着件「平反六四」T恤就要拉，李克強唔去嘅地方又要封，搞到想多走多看嘅李克強，無緣見到香港市民真實一面，真係該當何罪？

出席同一電台節目嘅教育評議會副主席何漢權就講番句公道說話，佢覺得今次警方嘅保安工作誇張，好似上周四佢出席港大百年校慶時，途中要經過四次安全檢查，反映警方安檢過咗火位，國家作為強大民族，無必要咁虛怯吖。香港社會唔和諧，特區警察真係「功」不可沒。