政壇：港大示威男再戰區選

港大百周年校慶典禮搞出警方強硬鎮壓學生示威嘅醜聞，搞到好多港大校友唔開心，當日本想和平示威、卻遭警方阻撓嘅港大校友羅健熙話，雖然港大校長徐立之事後同學生見面，但只係耍官腔，根本冇盡力為學生爭取言論自由，加上校長向來唔係作風強悍嘅人，呢一役真係令唔少校友心死。

○六年自港大社工系畢業嘅羅健熙，喺示威事件後，被起底話佢係白鴿黨成員，實情係佢畢業後已經入黨，○七年就參選過南區區議會利東選區，最終落敗，但會捲土重來參選嚟緊十一月區選。健熙話，中四時已經立志從政，升讀大學後更選讀社工，與服務地區嘅性質好類近。

從政以後，佢不時會走上街頭，家人都難免擔心，譬如去年反高鐵示威，佢就慘中胡椒噴霧，羅媽媽心痛勸佢「唔好咁激啦」，但佢只能好愧疚咁同媽媽講：「後生仔冇事嘅。」從政搵錢唔多，健熙話平時畀唔到好多家用屋企，但幸得家人支持，難怪佢最想多謝嘅，就係令佢放心實現理想嘅屋企人喇。