政壇：中大生做農夫攞創業獎
中大工商管理高材生，畢業後竟然做農夫？講緊嘅係年紀輕輕嘅鄭營啟，佢大學畢業後就投身搞廚餘回收同有機食物，將本地廚餘轉化成有機肥料，結果種出有營養嘅養生沙律及香草，尋日仲成為青年社企創業者大賞得獎者之一。
鄭營啟當初只用十萬元成立咗Green Collar社企，並為創業專登去台灣學耕田。鄭營啟話，屋企人原先唔睇好佢盤生意，仲質疑佢有乜理由要走去做農夫。雖然遭受連番打擊，但鄭營啟一於好少理，繼續堅持自己嘅決定，好想趁年輕做番啲自己想做嘅嘢。今次得獎，除咗肯定佢嘅工作外，筆獎金仲幫佢支付田地及房屋租金。
