政壇：煲呔曾唔知醜死撐冇伸手

國務院副總理李克強訪港，宣布咗三十幾項措施，除咗敲定香港發展為人民幣離岸中心外，都訓示港府高官要改善經濟、注意民生。連日來表現亢奮嘅煲呔曾好似患咗偏聽症咁，尋日出席一個電台節目時，更加避重就輕回應中央嘅要求，佢借批評本港「有些人」認為呢啲措施顯示香港依附於內地、向中央「伸手」為由，否認自己係伸手派，至於領導人嘅訓示，佢就閃閃縮縮，提都唔敢提。

被訓示隻字不提

煲呔曾尋日喺電台節目中以家書形式大講李克強訪港，強調內地宣布嘅連串措施製造咗「雙贏」局面，仲斥責有啲港人以負面、懷疑甚至挑剔嘅眼光看香港喺回歸後嘅發展，強調香港對內地金融發展有重要橋樑角色。講講吓，佢更得戚咁話，李克強訪港正可以將過去「香港只能依靠內地送禮嘅負面想法一掃而空」。講嚟講去，都係不知所謂嘅自我感覺良好。

佢侃侃而談，成千字嘅說話中，旨在話畀人聽呢啲措施係佢哋同內地經年累月不斷磋商嘅成果，仲話佢嘅團隊未來會點樣跟進呢啲金融措施。High到極嘅煲呔曾好似完全唔記得咗領導人要求佢改善民生嘅訓示，只係講咗兩句中央已經宣布會保障各類物資嘅供應，相信可以紓緩基層市民應付食物漲價嘅壓力，咁就交咗功課！

其實，李克強訪港後，好多香港人都關注連串措施點樣令市民受惠？煲呔曾冇向市民解釋，反而擒擒青澄清政府並冇伸手，到底係心虛定係此地無銀三百両呢？