家人男友不離不棄 「我想抓緊幸福」

【本報訊】「我未結婚，又未生仔，仲有好多嘢想做！」倩宜有一名拍拖四年、感情穩定的男友，自患病後男友對她不離不棄，令她好想抓緊這個幸福。

「每年男友生日，我都會整一本滿載我哋甜蜜回憶嘅相簿畀佢，今年可能做唔到啦！」看着往年送給男友的相簿，倩宜雙眼又再通紅。倩宜與相戀四年的男友原本計劃在三年後結婚，惟上天卻給她這個重大考驗，「依家我連做女朋友最基本嘅嘢都做唔到，行街、睇戲、食飯都唔得，結婚？我真係唔敢望！」

倩宜原想畢業後早日投身社會，減輕年老母親及兄長的經濟負擔，可惜命運弄人，現時母親仍然要繼續做清潔工，兄長更加因為要照顧她而「失業」。「我去睇醫生從來唔使畀錢，都係阿哥同媽咪畀，我知佢哋已經借咗人哋五、六十萬元。」正因為對家人及男友的感激及不捨，倩宜會努力活下去，「我唔可以放棄，因為我屋企人太好，好唔捨得佢哋。」