政壇：婦協中心開幕衣香鬢影
灣仔鵝頸橋底尋日下晝人頭湧湧，過百個城中貴婦、名媛不約而同出席位於上址嘅「香港婦協郭得勝服務中心」開幕禮，捐助中心重建嘅新鴻基地產郭氏家族，由長子兼非執董郭炳湘及太太郭李天穎聯袂招呼賓客。
郭太主力負責一眾名媛，見到已故一代船王包玉剛嘅長女包陪慶時，兩個人即刻聚頭慢慢傾。中華總商會會長蔡冠深太太蔡關穎琴都有撐場，佢手挽新加坡名牌Kwanpen最新款嘅紫色手袋，加上身穿嘅紫色花裙，真係襯到絕。婦協名譽會長、蔡志明太太蔡李惠莉一身貴氣衣飾則以深色為主，風格唔同，但各有特色。
蔡關穎琴（左）及蔡李惠莉盛裝出席，令現場生色不少。
郭李天穎（左）同包陪慶相當老友。