政壇：唐唐垃圾言論擦鞋闖禍

警方喺國務院副總理李克強訪港期間採取高壓保安，引來一致批評，三位疑似特首候選人尋日群起保駕護航，經常講錯嘢嘅政務司司長唐英年更再次失言，話保安安排侵犯人權自由嘅講法「完全係垃圾」，結果畀啲網民圍插，揶揄佢連垃圾都不如，仲大翻佢恐嚇八十後「車毀人亡」等(火羅)爆言論，今次真係擦鞋擦出禍！

三個疑似特首候選人尋日「勇」字當頭，唐唐就撐得最核突、最口臭，唔單止亂噏李克強探訪每個場合都有安排採訪，仲以英文答問題期間就爆句：「有關侵犯人權同言論自由嘅講法，完全係垃圾（completely rubbish）！」當堂令在場記者全部Ｏ晒嘴，結果畀人批評，「咁荒謬都有，一舊垃圾講一堆垃圾」、「一個垃圾不如嘅廢物」、「平時又唔出聲，一出聲就挺中央」、「畀佢做特首會點？！」

同一場合嘅全國人大常委范徐麗泰，就話理解警方嘅保安安排，但又話市民着「六四」T恤係「有意識」嘅。至於經常抽水嘅行政會議召集人梁振英，尋日話警方會根據情報作出保安安排，佢相信警方嘅判斷能力喎。