政壇：搞搞政：長毛做「特首」撼低鐵三角

城中人密切關注疑似特首候選人嘅動向，唔係「鐵三角」、就係傳人選高達七個咁多，點都好，政圈動作多多，網民又有另一個世界。Sony PlayStation早前就同一個網站合辦咗個「網絡紅人頒獎典禮」，其中「下屆特首選舉」中，長毛梁國雄竟一舉榮登特首，威過晒其他疑似人選。

據講，呢個網絡紅人的選舉，又以特首人選最受網民歡迎，共有一千五百人參加咗個網上投票，有一定代表性嘅，長毛仲可以話係高票當選添，因為佢個人獨得三成幾選票。

主辦團體負責人項明生話，結果反映投票嘅網民非常不滿政府施政，所以先會搵反政府形象深入民心嘅長毛做特首，目的不外乎衝擊吓政治同政圈，否則市民唔會揀呢啲激進人士做特首。

個選舉仲有一大堆網絡最紅最爆嘅人和事，例如最受歡迎網絡歌曲，就由大熱門《小明上廣州》奪得。主唱嘅李家仁醫生話，得獎後都唔會停止創作，話口未完，下星期就有新作《小明上深圳》，勢要小明去勻全球為止。