政壇：鬍鬚曾卸膊拉隊抖暑

國務院副總理李克強率團訪港三日，喺港九多區刮起陣陣旋風，港府高官嚴陣以待，多名司局級官員跟出跟入，服侍周到。不過，領導人一走，港府官員就即刻作鳥獸散，財爺鬍鬚曾更帶隊快閃，齊齊開心放暑假，鬍鬚曾一放就半個月，政壇蘇州屎唔使問揼晒畀財經事務及庫務局局長陳家強喇。環球金融市場正值大動盪，歐債危機會壞成點，家吓真係冇人知，不過，鬍鬚曾喺打仗時分咁樣放長假，都可見懶散嘅收工心態。

李克強走咗 局長唔扮忙

港府高官大都有喺暑假放大假嘅傳統，事關行政會議、立法會都放暑假，官員開少好多會，所以抖暑亦成為官場定律。不過，今年暑假特別多事，新政府總部搬竇未解決，李克強又率隊訪港，好多官員都被迫調整計劃，有啲人特登取消或改咗放假時間，問責司局長更加有多場公開活動，甚至要陪同李克強落區，唔忙嘅都要扮忙喇。

或者係咁，李克強啱啱結束訪港，大龍鳳落幕，高官咪個個回復舊狀囉。鬍鬚曾今日開始放假，直到下個月五號先返工；運輸及房屋局局長鄭汝樺都不甘後人，同樣由今日起放假，不過，佢只係放三日抖抖。另一個緊接放兩日假嘅係民政事務局局長曾德成，巧合嘅係，過去幾日，鄭汝樺陪咗領導人參觀房署總部及公屋家庭等地方，德成局長亦做咗幾次布景板，佢哋不約而同放假，係咪要回氣減壓呢？

呢排股市大震盪，尋日恒指一度大跌七百點，但早排出嚟穩定人心嘅財金官員就冇晒影，唔知鬍鬚曾係咪因為放假在即，心已經飛走咗？定係覺得小股民已經跌慣咗呢？