SUN世代：率領富「義」代 真誠服務青少

「社團工作比自己份工辛苦幾千倍！」今屆青年聯會主席葉振都（Adrian），同時身為志願者協會主席。他忙於打理家族生意，仍投放大量時間心思於社會工作，身體力行服務青少年，即使艱苦，依然一直堅持，全因心中的理念。「希望青聯延續過往的精神，真誠服務香港青少年！」

葉振都在英國攻讀土木工程學士，畢業後回港協助打理家族生意。負責房地產業務的他，即使不諳普通話，但仍膽粗粗獨自到內地工作：「當時真係一句國語都唔識聽、唔識講，惟有努力學習，喺汕頭做嘢五年，最大收穫係學識普通話，同埋了解到內地嘅文化。」

受兩個京奧少女義工感動

問Adrian工作辛苦嗎？他想也不想就答：「社團工作比自己份工辛苦幾千倍！」他於二○○一年加入香港青年聯會，至今已經十個年頭，更肩負重任，擔任今屆主席，致力服務青少年。參與過無數義務工作，當中最令他感難忘的，是○九年慶祝祖國的大型活動。「嗰次我係活動秘書長，籌備咗幾個月，過程好辛苦，例如要運送支全世界最大、六十米乘三十米嘅國旗、同埋要co-ordinate二萬幾個參加者，真係好困難，不過完成咗滿足感好大！」

除是青聯主席外，Adrian亦出任志願者協會主席，而創辦協會的經過，就要追溯到○八年的北京奧運。當時他擔任京奧義工，過程辛苦，五個人擠在一間房，睡在三格床，工作時間很長，但他亦毫無怨言。

而於京奧期間遇到的一個感人經歷，更燃起Adrian創辦義工組織的心。他憶述：「當時我哋香港義工隊，有兩個十八歲嘅女仔，被分配到停車場負責指揮交通，日曬雨淋，我怕佢哋嬌滴滴頂唔順，於是問佢哋不如調去啲冇咁辛苦嘅崗位，佢哋即刻拒絕，仲話『我哋嚟服務，無論分配去邊都願意接受！』呢句說話真係令我深受教育同感動！」

就是憑着這份熱心服務的精神，令他萌生出一個想法：「難得一班來自五湖四海嘅義工聚首一堂，好希望呢份善心可以延續。」於是他們創立志願者協會，而Adrian更被選為協會的主席，主要負責大型運動會的義務工作，亦會到老人院探訪和到中小學培訓等。Adrian不怕艱辛，堅持理念：「希望可以盡力貢獻香港，亦想證明青聯係真誠服務青少年！」

Adrian's Profile

現職：榮興集團控股有限公司董事

學歷：威爾斯大學土木工程系學士

公職：香港青年聯會主席、香港志願者協會主席

興趣：閱讀、踏單車