政壇：四叔估恒指明年見三萬
環球股市暴起暴跌，港股過山車嚇壞唔少小股民，恒地主席「四叔」李兆基尋日話，睇好中港經濟表現，仲樂觀估計恒指明年會見30000點！佢仲好開心咁講到幾個孫，佢話細仔家誠同千億新抱徐子淇新添嘅男孫「個鼻似爸爸、又似我！」大仔家傑嘅三個仔就各有性格。
恒地公關尋日畀咗份四叔嘅訪談資料我哋，四叔重申兩位公子李家傑同李家誠係王國繼承人，Peter（李家傑洋名）就首評自己有個千億老竇嘅感覺，就係「爽」！意思係「父親畀佢哋好多精神財富」。至於未來嘅財產安排，四叔好豁達咁話：「香港好多富豪，後代好多都爭爭吵吵。惟有你自己公道啲、安排得好啲，希望不會發生那些問題，我應該有個公公平平、合理清楚嘅安排。」