政壇：孫玥呻湊女辛苦過練波

國家女排來港出賽，咁啱得咁蹺，我哋尋日就見到曾被網民譽為球壇美人嘅前國家排球隊女將孫玥，佢同幾位後輩一齊出席一間美容公司嘅宣傳活動，仲抱住九個月大嘅囡囡何嘉琪。以前打波好狠嘅孫玥話，湊女搞到肌腱勞損，雙手手指經常有麻痹嘅感覺，呢啲苦楚，連以前做運動員日夜操練都未試過。

久違嘅孫玥雖已經做人媽媽，皮膚仍然白皙剔透。佢話，自己得閒會做吓facial，隔個禮拜去一次美容院。以前佢經常要四出打比賽，點樣護膚呢？佢話買定啲面膜定期敷吓就算，無謂行裝過多帶嚟負累，不過，佢認為護膚都係做防曬最緊要。

孫玥為湊九個月大嘅囡囡何嘉琪，搞到雙手肌腱勞損。