政壇：搞搞政：卓永興明潤總部地盤工

煲呔曾政府死要面追趕添馬艦新政府總部工程，搞到一班工人日日頂住高溫做餐死，唔少工人同工人家屬怨聲載道，紛紛向傳媒爆黑幕。可恥嘅係，政府呢頭收買人命，嗰頭勞工處處長卓永興出席一個活動時，竟然厚顏無恥咁呼籲地盤承建商關注工人中暑喎，咁樣假惺惺講一套、做一套，真係得政府高官至做得出。

卓永興尋日出席香港建造商會二○一一年安全推廣運動啟動禮，上台致辭大講建造業安全，仲話依家正值炎夏，地盤工人、尤其喺烈日當空下嘅紮鐵工人要小心，跟住仲話知道有啲地盤向工人供應多啲水、通風設施甚至淋浴設施，咁樣有助工人工作。佢講得好仁義，只係唔知喺新政府總部做嘢嘅工人聽咗會唔會更加火滾呢？

係人都知，新政府總部嘅工人趕工多時，即使室內高溫到四十二度都冇得抖，更有家屬見到一家之主捱到殘，憤斥煲呔曾無良、收買人命，卓永興冇理由唔知新總部嘅問題，點解唔首先關注吓嗰個地盤呢？