短打長擊：推行環保 一事無成

今年截至八月中旬，本港酷熱天氣警告生效日子有三十一日，遠超每年二十二日的平均數，現在才是八月，熱到爆炸的日子仍未結束，可見「酷熱天氣警告」已是本港夏日標記。政府推行「停車熄匙」，在夏天根本不宜推行，老朽建議廢咗佢，不切實際嘅嘢無謂擺喺度篤口篤鼻。

邱騰華搞環保，可以用「一」字形容，咁威？冇錯！係一事無成、一塌糊塗、一腳踢不出個屁來，完全係外行，環保政策冇瓣掂：停車熄匙係阿茂整餅；徵收膠袋稅添煩增亂，全港整體塑膠用量不減反加；闢郊野公園部分作堆填區超低能、勁搞笑，差點鬧出憲制危機；甚至連興建第三條機場跑道諮詢公眾，也忽略了環評報告……

以邱騰華搞環保嘅認知程度，唯一可以做到嘅就係「藍天行動」，推動二十五點五度室溫，敲鑼打鼓要「全城投入，為藍天打氣」。不過，起初煲呔曾話會在政府內部推行「夏日輕裝運動」，可惜素來愛搞形象工程嘅佢及其團隊為德不卒，唔夠三分鐘熱度又做咗「氣候逃犯」，高官依然盛裝上班，鬍鬚曾嘅眼鏡更加成日一層霧見記者。

「藍天行動」就此有名無實！環保組織更接獲近年最多的室內空調過凍投訴，此中包括法庭、醫院、港鐵、食肆等。想當年蔣介石搞「新生活運動」，倡「不煙、不娶妾、不准留西髮」，最後自己把這「三不准」全破了，其文膽陳布雷與蔣乃一丘之貉，跟蔣相呼應，這與今之港府搞「藍天行動」多麼相似！歷史總愛重複玩笑。