SUN世代：拒做少奶奶 金融才女再闖高峰
十年人事幾番新，過去十一年，御峰理財有限公司聯席董事冼康怡（Connie）亦在金融服務業中，跌跌碰碰地翻了幾番，由一個小小職員，慢慢攀升至董事的位置。她的成功之道，在於不怕蝕底，事事以客為先，為客人帶來最好的服務。
回想初入行時，Connie坦言那段日子是捱過去的。大熱天時穿着套裝、高踭鞋四出見客是平常事，遭無理取鬧的客人謾罵更是家常便飯。縱然如此，她仍願意以心待人，堅持以真誠打動客人，「我入行後處理嘅第一個客人，係個投資好叻、但比較長氣嘅伯伯，好多同事都說服唔到佢。我嚟咗之後，就開始同佢接觸，得閒陪佢飲吓茶，用心聽佢講嘢，結果兩三個月之後，就成功說服佢喺公司投資。」
金融海嘯打不倒
「其實依家好多經紀，都只係諗住開多啲單，唔係真心為客人着想，好多時做成單生意，就唔會再搵個客。但在我嚟講，我希望幫客人好好管理資產，搵到最適合佢哋嘅服務，大家keep到一個長遠嘅關係。」Connie以心服務客人，不但讓她得到客人信任，與不少客人成為朋友，她的事業亦愈來愈成功，更有機會轉職至大型外資銀行，大展拳腳。
正當事業一帆風順，○八年金融海嘯卻幾乎令Connie努力經營的事業毀於一旦，「金融海嘯發生後冇耐，我任職嘅銀行喺毫無預兆嘅情況下突然結業，亦開始咗我嘅失業生活。」
Connie並非家中唯一經濟支柱，丈夫更有能力讓她「退休」，過少奶奶生活，但女強人不願就此低頭。失業時，她痛定思痛，為將來重新打算，「之前覺得所有嘢都好易得到，到失業至知冇嘢係必然。所以嗰陣我重新思索自己嘅將來，同埋呢行嘅前景，覺得應該試吓喺其他方面發展。」適逢朋友介紹她到股票行工作，縱然薪金被壓低三至四成，她仍決定接受挑戰。
積極裝備等機會
「雖然我喺股票行唔係做咗好耐，但係有機會同啲大型投資公司接洽，仲識咗好多出色嘅投資經理。呢啲經驗真係好難得，我喺佢哋身上學到好多嘢，對我之後嘅工作好有幫助。」Connie把工作視為學習機會，於失意時積極裝備自己，等待機會來臨。終於在一○年，舊公司開發新投資項目，邀請她回巢主理，她亦樂於重歸本行，接受新挑戰。
在Connie帶領下，新部門運作已漸上軌道。對於將來她滿懷信心，「我會繼續喺資產管理呢方面發展，做好自己，帶領公司進步！」
Connie's Profile
學 歷：加拿大卑斯省大學金融系學士，香港科技大學中國商業工商管理碩士
現 職：御峰理財有限公司聯席董事
專業資格：特許金融分析師
興 趣：旅行、瑜伽
在冼康怡的帶領下，公司新部門的運作漸上軌道。
Connie經常擔任投資講座嘉賓，分享投資心得。
Connie（左）任職私人銀行時，出席公司頒獎典禮。
Connie（左）以一身埃及裝扮，擔任公司周年晚會主持。
年少時的Connie（中），與弟妹於家中合照。
以客為本的服務態度，令Connie躍升成為公司董事。