政壇：林一鳴捱完地獄馬拉松

金融界馬拉松好手、中信証券國際董事Eddie林一鳴近期完成咗奔闖阿爾卑斯山嘅創舉，最終用咗逾六小時十四分，跑畢四十二公里有多嘅馬拉松比賽，就連平日訓練有素嘅Eddie都形容為「超級辛苦、真恐怖、好凍呀」。

咁又係，由山腳一口氣跑到海拔近三千米高嘅雪山，正如佢所講，「有命回來就算啦」。雖然係咁，佢繼續參加馬拉松比賽嘅興趣未有絲毫減退，未來仲計劃北上發展，到西藏、北京萬里長城等地繼續跑步。更意想不到嘅係，佢八歲同三歲嘅囝囝都有參加早一日舉行嘅迷你馬拉松，用幾分鐘分別跑畢一千四百米同五百米。

除咗馬拉松愈跑愈高外，原來Eddie職場上亦步步高陞，由原本嘅中信証券國際董事（零售證券業務發展），升任至中信証券國際董事、證券零售業務及證券業務發展主管。新職位嘅職務同責任都多咗，例如要多啲落分行見前線員工，工作時間亦長咗，好似記者尋晚七點幾打電話畀佢嗰陣，佢話仲要趕返公司做嘢。