政壇：搞搞政：煲呔曾被訓示 范太踩多腳

訪港嘅國務院副總理李克強前日嚴厲訓示煲呔曾，話佢冇切實做好工作，但唔知佢係咪資質低聽唔明抑或扮懵當冇嘢。

全國人大常委范徐麗泰尋日出席國家「十二五」規劃與兩地經貿合作發展論壇時，被問到點睇李克強訓斥煲呔曾一事，佢就連招帶打話，李克強嘅言論唔算得上訓戒，因為總理喺工作報告時都經常提及要「落到實處」，所以認為李克強嘅言論，某程度上可視為一種鼓勵或者係推動。

既然講得係推動，多數係唔郁嘅大懶蛇先至要推嘅啫，莫非係想話煲呔曾係踢一踢、郁一郁嗰種人？究竟煲呔曾明唔明李克強所講嘅嘢，范太就話唔知道，叫記者問番煲呔曾喎！乜范太唔係同煲呔曾好熟嘅咩？范太隨即同煲呔曾劃清界線，話同煲呔曾唔係好熟，講到㷫起仲爆咗句：「我無咁榮幸，可以同曾蔭權熟。」咦！直情畫公仔畫出腸，莫非范太聞到中央全方位不滿煲呔曾嘅焦味？