政壇：長毛唔打呔無緣會李克強
平日不修邊幅嘅社民連立法會議員「長毛」梁國雄，尋日獲邀出席會展舉行嘅「國務院副總理李克強各界歡迎晚宴」，原本佢諗住可以直接上書中央領導人，提出釋放內地維權人士，點知入到酒店門口，保安竟然唔畀佢進入，原因係請柬講明要着正裝，冇打呔嘅長毛自然唔入得。長毛同保安理論多次後，保安堅持要佢換番套正裝入場。
不過，長毛未有放棄，即刻撲去附近示威區同社民連啲兄弟「借衫借呔」，點知佢啲兄弟都係T恤牛仔褲打扮，最後班兄弟就搵咗條手挽帶畀長毛當呔用。當時長毛亦唔理得咁多，求其打個結就衝入會場，但係最後都係衝關失敗，同李克強緣慳一面。
長毛話上次前國家副主席曾慶紅訪港期間，佢都係着住「T恤老牛」出席宴會，估唔到今次入唔到場，大嘆當權者只愛富貴人家，不喜平民百姓喎。
