政壇：靚女區選鬥搶男粉絲

政界近年掀起美女旋風，唔少政黨搵班靚女黨員出戰年底嘅區議會選舉，意圖搶攻更多席位，呢股潮流仲有愈演愈烈之勢添！

先有盛傳會代表選民力量狙擊白鴿黨嘅前港姐袁彌明，原本話佢會去黃埔東，近日據講或轉戰中西區狙擊甘乃威，希望真係成事啦，否則肯定好多中西區男粉絲失望啫！

Casta 疑似被暗戀

繼而又有富貴黨「政壇鍾嘉欣」Rainbow歐銘絲，佢選擇嘅麗興選區同樣屬於荃灣區議會，而最新成功搶灘嘅係新界社團聯會理事Casta呂迪明，佢正積極考慮喺梨木樹東出選，單挑資深區議員陳琬琛。

Casta本身係舞台劇演員，外表亮眼已經出晒名，據講佢平時落地區工作好受歡迎，而為咗方便工作，佢好多時都不施脂粉，但勢估唔到咁都吸引到一個忠實支持者。Casta話有次去上培訓課程，幾日冇落區之嘛，呢個男粉絲之後見番佢，即時好緊張上前噓寒問暖，又關心佢去咗邊度，義工就取笑Casta，話咁快就有人暗戀佢喎。

之不過，佢明年二月就會結婚喇，唔知佢嘅粉絲會否好失望。講番地區工作，Casta憶起有一次去鄉村探訪，點知人生路不熟，唔小心半個人跌咗落坑渠，幸好只係皮外傷，冇乜大礙，但事後就有鄉民將親手種植嘅水果送畀佢，佢笑言今次都算因禍得福喎。

梨木樹東選區比較特別，範疇包括好多條鄉村，Casta依家喺新界鄉議局副主席張學明旗下服務處工作，唔知荃灣鄉事委員會主席鍾偉平會唔會因為咁支持佢呢？