SUN世代：手術幕後 HERO

生老病死，是人生必經階段，同時亦帶來無限商機。醫科創建有限公司總經理鄧長政（Gene），雖非出身杏林，但有着醫者仁心，與生意人的獨到眼光，看準手術用具市場龐大潛力，八年前開始與友人合資生產微創手術儀器，現時更建立起自己的品牌，為病人健康盡力。

「每當有新朋友問我做邊行，我都會畀個謎語佢哋猜：有一樣物件，你同我都有機會用，但係無人會想用；就算要用，用嘅時候我哋都唔會知，亦都唔會由我哋買。」Gene拿着由其公司生產的微創手術儀器，打趣地說。

展開生產微創手術儀器事業前，Gene對醫學可謂一無所知，大學時期他修讀電腦學科，回港後亦理所當然投身IT界，後來更與友人合資開設公司。但○三年，全球科網泡沫爆破，迫使他重新思考將來路向，「嗰陣覺得IT嘅發展前景有限，於是想發展其他生意，婚姻介紹、快餐，連石油提煉同開採煤礦都有諗過！咁啱我partner識得啲醫生，問我哋有冇興趣生產手術儀器，我哋覺得係個機會，就決定試吓。」

親身觀察手術過程

「要造出最啱醫生用嘅儀器，最好嘅方法就係親身睇醫生做手術，睇吓點嘅用具先可以令手術做得更順暢！」為求造出讓醫生用得稱心的手術儀器， Gene努力惡補醫學知識，不但在網上搜集資料及向醫生請教，更親自走進手術室，觀察手術過程，「我睇咗幾個唔同類型嘅手術，其中印象最深刻，係睇切除胃癌病人癌細胞嘅手術，個手術做咗足足四個鐘，切除咗個病人四分三個胃！」

對手術過程有更真切了解，Gene生產出的手術用具，用家均好評如潮。其後他更開發自家品牌，目標打進世界市場，「我哋第一樣推出嘅產品，係微創手術用嘅刺穿器，已經喺部分國家拎到衞生認證，醫生用完嘅feedback（反應）都唔錯。嚟緊我哋會研製喺微創手術期間，用嚟撥開器官嘅儀器，依家仲係研究階段，收集緊醫生嘅意見。」

工作雖忙，Gene亦不忘回饋社會，多年來活躍於各青年商會，以商會作為服務社會平台。去年，他當選國際青年商會香港總會會長，「工作雖然重要，但唔係生命嘅全部，所以我想趁仲有能力，貢獻社會，幫到更多有需要嘅人。」

社會事務繁忙，Gene寧願暫時放下工作，犧牲自己的私人時間，依然無怨無悔，「商會上年總共有三百幾個活動，我就出席咗二百九十幾個。雖然犧牲咗好多陪屋企人嘅時間，部分工作亦因為咁落後咗，但我依然覺得好值得。」

Gene's Profile

學 歷：澳洲墨爾本大學電子工程學系學士、澳洲墨爾本大學計算機科學系學士

現 職：醫科創建有限公司總經理、Nex Medical Limited總經理

社會事務（部分）：

國際青年商會香港總會上屆會長、中華全國青年聯合會委員、衞奕信勳爵聯合世界書院獎學基金理事

興 趣：籃球、跑步、滑雪