政情：陳細潔藏紅酒年賺一成
保良局一眾高層尋日為九月十七號舉行嘅《星光熠熠耀保良》做宣傳，在場見到「鯊魚女」Abbie陳細潔，佢話股市波動太大，為免食驚風散，十幾年嚟都只投資法國靚紅酒。
陳細潔家中珍藏逾千支名酒莊嘅紅酒，每支年年升值，每年穩賺百分之十。佢不時出席紅酒拍賣會掃貨，可惜因為知名度高，內地豪客見佢舉手，即時瘋狂搶埋一份，搶高晒啲價錢喎！
保良主席龐盧淑燕就趁日前股市插水，掃入幾隻優質藍籌股長揸；副主席、賭王四太梁安琪就認為揸磚頭最實際，近日樓市回落，正係入貨良機，佢首選優質地段：「單位細啲都冇所謂，千祈咪貪大、貪平，地點最緊要。」
陳細潔投資紅酒每年穩賺百分之十，回報好吸引。