政情：龍殿兒享受歐美日光浴
Kee Club太子女龍殿兒趁今個暑假同家人周遊列國，去旅行嘅同時又可享受天倫之樂。早前佢就去咗紐約同意大利，仲曬得一身古銅蜜糖膚色返嚟，佢話：「喺紐約逗留咗三個星期，之後又去咗意大利兩星期。我哋年年都會去意大利，已經去咗十五年，因為當地有個同我哋好好朋友嘅family friend，我哋年年都會去探佢哋。我喺紐約同意大利都有成日曬太陽，我好鍾意曬太陽，曬完會開心啲同埋覺得健康啲。如果喺香港，就會同朋友出海曬。嚟緊我又會同屋企人去東歐、威尼斯同維也納旅行，我哋會自駕遊，今次會玩十日。」
平日佢都會參加一啲慈善活動做義工，又話：「等我知道自己鍾意讀咩先讀大學，依家會修讀一啲短期課程同埋喺屋企自修，要不斷學習新嘅嘢。」
龍殿兒遲啲又會同屋企人去歐洲自駕遊。