政情：Google吞摩毫子股烏龍搶高

Google吞併摩托羅拉手機業務，刺激研祥智能（02308）尋日開盤爆升5倍！原因咪又係兵荒馬亂，有人「誤中副車」囉。

做資訊科技嘅研祥智能平日好冷門，但呢隻毫子股尋日一開波竟然報3.46元，比周一收市價0.7元爆升2.76元，升幅近5倍，睇到大家眼都突。即刻開個20大升幅榜嚟睇，發現隻富士康（02038）都好標青，開市都係彈升超過一成。

Google呢單世紀大收購，帶挈埋富士康，開市前個價已經搶到亂晒龍，結果以3.6元高開5%，高位更加見過4.02元，最多升成17.2%，好明顯有人將「2038」入錯成「2308」。

之後十點半果然見到聯交所登咗呢單烏龍盤申報，涉及12,000股，每股3.46元，交易額4.152萬元，好彩中間個差價都係3萬3千幾蚊，就算個粗心大意嘅經紀要硬食，都唔算真係痛入肉。