政情：搞搞政：單雞玩空降人民力量狙擊

喺○七年區議會選舉，新民黨主席葉劉淑儀嘅親信黃楚峰喺灣仔大坑選區僅以一百票險勝白鴿黨前議員李慶偉，所以有白鴿中人認為，副主席「單雞」單仲偕憑多年從政名氣，空降落去參選都有得博。據聞，單雞幾個月前已落區派單張，仲聯同該黨港島區支部主席李建賢等人組成「灣仔幫」，希望利用黨嘅名氣帶動選情。

但單雞勢估唔到「黃雀在後」，人民力量知悉後即派出主席「劉嗡」劉嘉鴻落場，勢要轉軚支持政改方案嘅白鴿黨票債票償。劉嗡早前亦開始喺大坑派宣傳單張，擺明向單雞宣戰，就算贏唔到議席，都要單雞落選，睇嚟單雞今次復出，存在好大隱憂。

有熟悉當區嘅人分析，話人民力量屬激進政黨，就算加入混戰都只搶到白鴿黨票源，屬建制派嘅新民黨應該絲毫無損。再加上區議會選舉根本係泥漿摔角，大家嘅票數唔會差太遠，如果劉嗡能夠吸走單雞一百幾十票，喺泛民打泛民之下，呢個選區選情亂晒大坑，單雞隨時第一個被飛出局。