政情：邱騰華騎劫學生晒膠袋稅

夕陽政府班高官，做乜都無能為力，衰咗淨係識得龜縮、快閃，但最叻就係出嚟搶功。

早幾日同大家講過，環境局局長邱騰華喺今個月十二號起休假四日，咁啱嗰日就係政府公布取締鎢絲燈膽諮詢文件，佢老哥放假，於是乎要假手畀機電工程署代行。點解佢唔揀放假前夕親身出嚟講呢單嘢？旋即令人懷疑佢係唔想再被挑起慳電膽現金券疑似益煲呔曾親家嘅醜事，於是索性避開，費事出嚟畀傳媒舊事重提「親家膽」事件，令自己尷尬。

邱騰華避走香港四日後，尋日結束休假返工，佢出席一個學生環保體驗營，同中學生分享低碳生活貼士。咦！一返工就拋頭露面？原來尋日咁啱得咁蹺，係第二階段擴大膠袋徵費計劃諮詢期完結，時間校得啱啱好。

自我感覺良好

眾所周知，佢出名唔鍾意正正經經開記者會交代政策，所以吸引咗大批傳媒到場追問佢有關諮詢結果，佢聲稱至今收到過千份意見書，大部分認為第一階段膠袋徵費有成效，初步意見支持擴大徵費範圍喎！

嗱！邊個會知道意見書講乜吖，咪只有政策局囉，而邱局長當然可以預先掌握到呢啲資料，知道多人撐咯，於是咪蒲頭囉。之不過，佢口噏話初步意見支持擴大徵費範圍，但同一般市民、商戶、環保團體嘅睇法相距甚遠，真係好難令人信佢囉！究竟諮詢結果係咪好似佢咁講，睇埋份正式嘅諮詢報告至定奪。

仲有就係佢喺嗰個學生環保體驗營回應擴大膠袋徵費諮詢時，簡直喧賓奪主。究竟佢係真心想同班後生仔傾偈，抑或想借班後生仔過橋做騷攞彩，就只有佢自己先至知嘞。