政情：留英學生拍片撐競爭法
拖咗好耐嘅《競爭法》仲係甩甩漏漏，仲傳聞話會變為無牙老虎。一班留學生睇唔過眼，話政府講嚟講去都講唔到重點，搞到唔少商界都怕怕，索性自己動手，拍咗條片擺上網宣揚法例。
班有心學生係公文袋議員辦事處嘅實習生，其中有份拍片嘅David陳振良依家喺倫敦政治及經濟學院讀緊法律。佢話當年讀緊中學時，幾間學校合謀定價，搞到學費好貴，好彩英國政府立咗《競爭法》，令學費平番唔少，先至唔使咁辛苦儲錢交學費。
David話由於自己係受惠者，就算特區政府幾唔識做，自己都想幫香港做番啲嘢，所以佢同班港大學生拍咗條短片，除咗解釋《競爭法》係乜嘢一回事，仲有晒例子講解，而且分成四集擺上網，包唔會睇到悶。好心商務及經濟發展局局長蘇錦樑學下班學生，咪咁故步自封啦！
陳振良（左二）話自己當年係《競爭法》受惠者，希望香港學生都可以好似佢咁，享受低廉學費。