政情：曾詠芝難民體驗好心酸
香港女青年商會會長Winnie曾詠芝話，喺就職八個月以嚟最難忘係早前商會同聯合國難民署合作搞嘅難民體驗營，有人扮軍人、亦有人扮難民，佢就扮十二歲嘅中東細路女，大熱天時都要戴晒頭巾。
喺模擬難民營入面，食嘢要排隊，唔止排隊攞糧食，攞糧食前仲要排隊攞個兜裝住啲食物。咪以為啲糧食唔使錢，軍人會收錢之餘，見你身上有靚錶靚飾物都會搶埋，你唔畀分分鐘用槍指住你，真係驚到震。
Winnie話雖然個活動只係幾個鐘，都令佢好心酸，覺得喺難民營生活嘅人好似冇希望、冇明天咁。諗到香港有啲80後郁吓話跳樓，覺得大家應該放眼世界，諗吓點可以幫到社會。
Winnie（右）同香港女青年商會女會員參加難民體驗營活動。
難民體驗營入面有帳篷，模擬難民居住嘅地方。（香港女青年商會提供）