政情：飛行一哥力抗挖角潮
依家航空業向好，連政府飛行服務隊機師都被撬走。記者直接問該隊總監「飛行一哥」陳志培有冇畀人挖角，佢笑住答：「呢個比較尷尬！」佢話外間挖人只要啱使，就唔會理一個人嘅背景就會「approach（接觸）你」，但做高級公務員轉工要過冷河，都有啲煩。聽佢咁講，不言而喻喇！
挖角潮令陳Sir好頭痛，佢話未來二十年亞太區航空業求才若渴，波音公司估計需求十八萬機師同二十五萬維修人員。近三年度飛行服務隊就走咗六個機師，有一個仲係做咗十九年，粗略計訓練費差唔多成三千萬元。
陳Sir慨嘆訓練一個機長要十至十二年，走只要一個月通知，有人仲急到賠錢走，年資十年嘅機師，政府人工約七萬元，外面就約十二萬元，仲有花紅，根本冇得比。
陳志培忙住解決機師挖角潮，但佢都被人「試水溫」。