政情：搞搞政：新立會議辦高低有別

立法會能否如期喺下個月搬往添馬艦嘅新大樓辦公，依家仲係未知之數，但六十名議員嘅辦事處已暫定喺本周五開始陸續搬竇。

新大樓原先安排咗四個樓層做議辦，即每層十五名議員啱啱好，但由於各黨派都唔想同人民力量「大舊」陳偉業同黃毓民、社民連嘅「長毛」梁國雄三子做鄰居，最後被迫分開五層，樓層編排仲疑似親疏有別，立場愈激愈反動就編喺愈高層，愈保皇就愈低層。

例如成日鬧政府同開會掟嘢嘅人民力量同社民連三子，其議辦就喺最高嘅十樓，最保皇嘅建仔、中總黃宜弘同工聯會就喺最低層嘅六樓。有議員笑言，將來有乜重大議題要緊急進行表決，保皇黨議員肯定快過班反對派仆落樓投票，對政府有利；而人民力量同社民連三子要掟嘢都花多啲時間先趕到去議事廳。

有議員又爆料，新大樓高座每層都有一個無敵煙花海景位，估計市值月租肯定萬萬聲，分別編配咗畀大舊、民協馮檢基、廠商會林大輝、體育界霍震霆同立法會主席，呢班議員中部分人都好少返中區議辦辦公，搞到其他編配咗冇海景位嘅議員都有會唔會嘥料嘅疑問呢？