政情：肥亨科網股爆煲喻CY
商務及經濟發展局前局長馬時亨尋日化身財金評論員，以財金角度點評疑似特首候選人唐唐、CY梁振英同范徐麗泰呢個「鐵三角」，將三個人比喻為三種唔同嘅股票。三個人邊個好啲？就睇吓邊種股票啱你嘞！
肥亨尋日喺一個電視節目上話，唐唐係公用股，特徵係穩定性高，投資有息派，盈利增長亦好易預測。佢形容范太係銀行股，因為對方好似商業銀行咁係穩健派，但目前投資環境唔清楚，貸款搞唔搞得掂亦唔清楚，至今亦都聽唔到好多佢嘅理念喎。對於CY嘅評論，肥亨就冇咁客氣，佢將CY比喻為科技股，笑言創新並非壞事，但佢話鋒一轉，潑冷水話科技股條路好艱難，得嘅話就不得了，亦有風險搞到焦頭爛額，好似○○年科技股爆破咁。
身兼中策集團主席嘅肥亨係財經界人士，佢嘅點評究竟有冇反映財經界人士嘅意見，就得佢至知。