政情：黃家和失iPad囝囝送新機
啱啱忙於舉辦「金茶王比賽」嘅點點綠主席Simon黃家和，前日同大仔Howard黃浩鈞飲完下午茶後，趕返會展搞美食博覽。晚上八點，忽然發現唔見咗部iPad，原來部機係囝囝舊年送嘅生日禮物，佢喺facebook訴苦，呻到滿地樹葉，fb有二十個留言慰問，但囝囝都冇搭訕，原來佢馬上用軟件遙控刪除遺失iPad內嘅所有資料，仲靜雞雞走去買部全新iPad2，再放喺爸爸公司枱面製造驚喜。
翌日Simon返到公司見到份禮物，開心到幾乎喊出嚟，兩父子之後仲研究點樣玩新機添！Howard好少亮相社交圈，原來佢喺爸爸公司任職餐飲服務部總經理，長駐上海打理中國業務，近排見爸爸搞金茶王比賽忙到氣咳，於是飛返港幫手。
黃家和（左）呢頭遺失iPad，轉頭獲囝囝Howard（右）送贈新iPad2，冧晒！（黃家和提供）