政情：建仔第二梯隊舊人造反上位

近年刻意走年輕路線、猛咁捧後生上位嘅建仔，終於發現唔係個個都值得捧，好似副主席張國鈞咁，就係扶極都扶唔起嘅例子之一。本來建仔已經喺年底區議會選舉搵定個靚位畀佢接，但聽聞佢仍然懶懶閒咁，搞到勝算唔高。建仔明年立法會港島區直選，本來預埋佢一份，但依家就諗住畀壓抑多年嘅「永遠第二梯隊」鍾樹根一嘗帶隊滋味。

次次選舉都係幫人抬轎嘅樹根，到依家都未嘗排名單第一嘅感覺，谷咗啖氣都有十幾年。有傳話佢見到自己永無上位之日，已經萌生去意，曾經同黨內高層講過，如果下屆立法會選舉冇得排第一，就會退黨參選。眼見自己友籠裏雞作反，建仔念在樹根抬轎多年，無功都有勞，姑且還佢心願，畀佢試下帶隊直選。

張國鈞唔爭氣選情有隱憂

樹根喺地區工作多年，依家已經係東區區議會副主席，未來更有望再上一層樓做主席，喺東區有一定勢力。有建仔中人分析，話佢可帶隊盡攬東區同南區票源，另一條名單就帶隊主攻灣仔同中西區，學足白鴿黨咁「分區配票」，到時建仔喺港島區染指兩席並非冇機。

但講到尾，建仔用番舊電池樹根都唔用自己捧出嚟嘅張國鈞，都怪張國鈞自己唔爭氣。原先黨內已搵到陳特楚區議會嘅席位畀佢安插，呢個位置左派勢力雄厚，理應安全頂替。但近日白鴿黨都派人出選，令張國鈞選情有隱憂，甚至要搵黨內「大佬」嘅老巢觀龍樓畀佢選至穩陣。估唔到建仔一心諗住捧第二梯隊出戰，但依家有小小差池就即刻用番舊人，睇嚟喺建仔做第二梯隊，運氣都佔好大比數。