冧樓「係謀殺唔係意外」

馬頭圍道唐樓倒塌導致四死慘劇的死因研訊昨日審結，死因裁判官今裁決。死者家屬在結案陳辭時再度灑淚，並痛陳屋宇署馬虎失職、麻木不仁，業主及二房東只着眼金錢利益，工程判頭無專業資格又太自信，才是慘劇罪魁禍首，他們認為死者是被人蓄意疏忽所殺：「係非法被殺、誤殺」。

死者童慶濤的母親李珍華因情緒激動，甫開口便淚如雨下，最後須由女兒代為讀出陳辭。她指塌樓表面上是意外，但「整件事係大業主同二房東嘅貪婪，判頭嘅自大無知，再加上屋宇署無能、麻木不仁所造成嘅。」她說：「幢樓倒冧完全係由於呢班人蓄意疏忽，我個仔實際上係畀佢哋謀殺，佢無端端犧牲咗，死因係呢班人嘅貪婪、涼薄同愚昧無知。」

童母指屋宇署職員毫無責任感、處事馬虎，其中針對事發前曾到現場巡查的測量師。她說：「話睇過幢樓無即時危險，事實證明佢哋係錯，佢哋睇樓嘅水平仲差過無牌判頭。」她批評屋宇署職員：「一啲都唔專業，佢哋如果唔係嚴重失職，就係判斷有問題，佢哋做事敷衍塞責、得過且過、草率了事，係造成冧樓嘅幕後黑手！」

此外，她認為業主及二房東眼中只有錢，將單位非法變成劏房出租賺錢，之後又為慳錢而無聘請合資格人士，反將工程交予無牌判頭處理：「佢哋明知幢樓有危險唔理，最緊要係租出啲單位，又係錢大晒，錢緊要過人命。」對於承辦商朱偉榮，童母直言：「明知自己無牌，乜都唔識仲要死充，收咗人錢就乜都唔理。」

另一死者蔡道強的遺孀李翠新，哽咽着向死因官陳辭：「今次係誤殺、謀殺，並唔係意外。」

李翠新力陳塌樓完全可以避免，但業主無遵從屋宇署命令聘用合資格承建商，無牌承建商又無依照專業人士建議先進行鞏固工程，種種違法行為終令慘劇發生，故要求法庭裁定死者死於誤殺甚至非法被殺，更希望法庭要求當局起訴違法者。

僭建物遲遲未拆

李翠新斥屋宇署處事官僚馬虎，對大廈早出現的結構問題視而不見，令塌樓危機潛藏多年。首先，屋宇署測量師於○九年十一月十八日曾到大廈眼見鋼筋生銹彎曲變形、外牆石屎大量剝落，仍認為沒即時危險，遲遲不發封樓令。他亦承認當時已知大廈有違法劏房，但從沒向業主發出還原命令。他又說大廈早於○六年已被列為屋宇署清拆僭建目標之一，三年後到塌樓之時，僭建物仍存在。

案件編號：CCDI 102-5/11