政情：劉晉最怕食飯玩iPhone
美食博覽尋日喺會展舉行「星級名廚示範」，留家廚房老闆劉晉示範四十五分鐘煮五道菜，包括鴨髀飯同桂花忌廉雜果杯。劉晉愛食出人情味，每次去旅行首選逛街市，走入書局都係搵食譜。佢認為每餐飯都係神聖嘅，最怕見到香港人一邊食飯一邊玩iPhone，話咁就最無癮。
佢爸爸劉健威係食家，但有兩樣食物一定唔掂，就係螄蚶同雞泡魚。劉健威話，獅蚶帶有唔少寄生蟲，曾有朋友生吃螄蚶後病咗半年，後來仲過咗身；至於雞泡魚，佢曾經冒險喺番禺食過，後來有朋友提醒，話日本每年都有攞咗牌嘅劏雞泡魚師傅中毒身亡，一言驚醒夢中人，從此唔敢再食嘞。
劉晉示範炮製香噴噴嘅鴨髀飯。
桂花忌廉雜果杯係劉晉拿手之作。