政情：余健志飲食講生態人道
現代嘅飲食潮流，追求美食之餘又要講求生態人道，飲食達人Jacky余健志就係其中嘅例子。
當Jacky投飲食業後，開始發現一啲食材背後嘅真相，例如鵝肝，就係拚命填塞鵝隻嘅腸胃而成，過程十分之唔人道，所以唔再選用；魚翅嘅來源有損海洋生態；髮菜嘅採摘對土地有害；鹿茸嘅割取又頗為殘忍，所以呢啲食物統統喺Jacky嘅飲食名單之中剔除。無論呢啲食材有幾咁好味，若然有違生態環境同人道立場，就唔會沾上佢嘅味蕾。
Jacky又話注重健康同環保係飲食潮流嘅趨向，亦惟有咁人類文明至可持續發展。佢尋日就喺美食博覽中，做嘉賓示範一道好傳統嘅甜品料理－麻蓉湯圓；雖然製作過程好簡單，但佢都好耐心咁講解，並乘時推介佢嘅新書。佢喺為粉絲簽名時仲順便提上「惜飲惜食」四個字，真係語重心長。
余健志話飲食潮流係講求健康同環保。