政情：搞搞政：腦殘傻強派錢大輝鬧爆

財爺鬍鬚曾炮製「史上最廢」財政預算案全城怒吼，其後「跪低」向合資格市民派發六千蚊亦搞到一鑊泡。財經事務及庫務局局長「傻強」陳家強日前出嚟再講六千蚊時，繼續以陳腔濫調企圖蒙混過關，令人睇到火滾。

與其等呢個腦殘嘅政府打救，不如自求多福，其中「社區十八」嘅牽頭人立法會議員林大輝打頭陣，計劃透過佢哋嘅地區網絡，招募至少數十名義工幫手，搵啲區議員辦事處或者租個地方為長者登記攞錢。

大輝一講起政府派六千蚊嘅安排就火氣十足，直言政府唔關愛啲長者，否則直接用生果金、綜援戶口過數，就唔使咁麻煩，都唔明點解要講乜嘢私隱理由嚟推搪。就算以上嘅建議唔得，佢都有可行嘅後備方案，索性喺全港十八區嘅馬會投注站設立領取六千蚊專櫃，令長者可以又方便又快捷登記。

距離首日登記拎錢剩番十幾日，各大政黨一早就鬧爆政府叫佢優化派錢安排，如果仲係話之你死，到時如果有老人家出事，傻強咪使旨意道歉就可以甩身。