政情：霍彩玲話司儀要識執生
香港女青年商會最近搞緊「全港司儀大賽」，尋日就請咗○五年首屆冠軍Amanda霍彩玲，及有豐富司儀經驗、兼自己開婚宴統籌公司嘅Ben馮敬斌同參賽者分享心得。做司儀最緊要識執生，Amanda話每次工作都要諗定好多個可能發生嘅情景，咁先可以臨危不亂。
Amanda話有次做商場活動司儀，嘉賓表演時突然響警鐘，周圍煙霧瀰漫，啲商戶都落晒閘，佢見到啲觀眾開始不安，就即刻向工作人員了解，知道現場安全後就趁表演嘅空檔上台安撫觀眾搞氣氛。到成個活動完咗，先知原來係有解款箱跌咗落地後響鐘冒煙。
不過，阿Ben就話司儀係殘酷嘅工作，因為司儀永遠都唔會係主角。至於點做個出色嘅司儀，佢話台型好緊要，佢仲自嘲自己唔夠高大威猛，所以要靠衣着同聲線搭夠喎！
香港女青年商會會長曾詠芝（右）邀請Amanda（左）出席工作坊。
阿Ben自嘲唔夠高大，要靠衣着、聲線等搭夠。