政情：張佐華為東華處男獻唱

下個月二號就係「愛心滿東華」籌款騷，東華主席張佐華到時會獻出第一次，處男登台唱出歌神許冠傑名曲，呢排佢連搭車、沖涼都練吓歌。而為咗籌集免費醫療服務經費，東華副主席Ivan施榮恆做籌委會主席，佢搵嚟廣華名醫樂隊Band One，同張主席夾band唱歌。

上周大家拉隊去廣華Band房練歌。Band One成立咗五年，隊長係廣華病理部主管許伯君，仲有神經外科部門主管郭正光醫生。初次夾band，大家出奇地啱Key。張主席同Ivan試唱《浪子心聲》、《天才白癡夢》等，有唱家班水準。Ivan原來係Sam許粉絲，金曲早已琅琅上口，佢仲自爆唱歌秘技，就係上台前飲少少紅酒或白酒，放鬆喉嚨，把聲就會特別靚。

張主席就不忘為廣華賣廣告，佢話十月九日係廣華一百歲生日，屆時將有世紀生日派對，請齊曾喺廣華出世嘅市民齊吹蠟燭。想參加派對嘅「廣華人」，要快啲聯絡東華嘞。