政情：建仔白鴿黨開Apps被鬧爆

iPhone手機風靡全球，iPhone App更是大行其道，建仔趕時髦，率先喺月初設立「社區報料iPhone App」，等市民可以隨時上載照片投訴報料。畀建仔搶咗頭啖湯嘅白鴿黨，突然喺五日後火速開咗官方App，睇怕都係唔想蝕底啦！之不過，初步睇嚟完全唔work。

點解？因為大部分有下載呢兩個Apps嘅用戶，留言時都鬧爆兩個黨昔日嘅所作所為。建仔更被鬧到體無完膚，有市民揶揄時常「成功爭取」掛在嘴邊嘅民記，「成功爭取綠燈公仔延長兩秒，成功爭取狗糞收集箱，成功爭取北極有企鵝」；仲有市民直斥建仔最無恥添！

白鴿黨亦都唔好得去邊，有市民狠批佢哋支持二○一二政改方案，簡直就係呃選民，而且關鍵時刻出賣香港，真係令人神共憤，揶揄白鴿黨根本同建仔冇分別。

講到底，兩黨突然緊貼潮流都係想為區議會同立法會選舉提早鋪路，希望投其所好，到時80後嘅票就自然手到拿來，但依家兩黨既得不到80後嘅欣賞，仲要自設多一個平台畀人翻舊帳鬧爆，咁咪即係自己攞嚟衰囉！