政情：林雨陽變吊帶男區選狙擊白鴿黨

早兩日我哋講過，一向花臣多多嘅選民力量安排「星屑醫生」歐陽英傑落黃埔做宣傳，嚟緊甚有機會喺十一月區議會選舉挑戰現任區議員、早排發表懲罰選民論而備受千夫所指嘅「鼠王芬」梁美芬，以及原來打算單挑梁美芬嘅白鴿黨新星黃碧雲。

星屑醫生尋日同班兄弟落去紅磡派傳單，選民力量主席林雨陽遲咗少少到場，比起人民力量立法會議員黃毓民仲遲，真係抵罰。不過咁，見林雨陽一身黑超加吊帶嘅型仔打扮，令佢加番唔少分，今次就算數啦！雨陽話近排喺海怡西選區工作，主力挑戰白鴿黨中委馮煒光，由於自己地區工作時間較短，為咗短時間內畀選民認識佢，決定由前日開始日日着吊帶，務求突出自己形象，等選民容易記得佢咁話，咁即係話「吊帶男」狙擊中鴿喇！

星屑醫生盡量每日落區

講番尋日個宣傳活動，由於天氣實在太熱，一班選民力量成員派傳單派咗冇幾耐已經汗流浹背，就連林雨陽都笑言自己年紀大，派一陣就索晒氣。反而星屑醫生就唔同喇，雖然佢不斷嗌咪，而且滿頭大汗，但佢笑言正正因為大汗，所以先至唔會中暑，不過佢都話喺呢啲天氣落區，最緊要係飲多啲水，否則狙擊不成身先死就大件事。

星屑醫生間醫務所位於北角，佢承認之前較少落黃埔區做嘢，但由尋日開始，每日都會盡量抽時間去宣傳，總之希望追得幾多得幾多喎；佢仲話北角碼頭有船去黃埔，第時食晏有可能都會抽時間落區玩玩咁話。

咁都啱嘅，佢要挑戰嘅目標都有地理優勢，鼠王芬係區議員，當區有辦事處；而黃碧雲本身亦喺紅磡理工大學返工，平時落黃埔都係幾分鐘之嘛，如果選民力量真係想場仗打得好好睇睇，咁就真係要再加把勁嘞！