政情：梁永祥離恒生苦練高球

恒生銀行尋日有個頗令人突然嘅公布，執行董事兼個人銀行業務主管William梁永祥將會喺年底前離開恒生。William話今次離開唔係退休，更加唔係健康理由，只係喺恒生工作咗十七年，覺得有啲攰，想事業展開新一階段，所以先有呢個艱難決定，佢仲笑言之後要努力搵工先得。

William係恒生嘅老臣子，自九四年加入恒生後一路晉升至加入董事會，一手一腳「湊大」恒生信用卡。佢都好唔捨得班同事，同事亦密密約佢食飯Farewell，佢講笑話希望唔會食到變肥仔。

佢將喺下周六（二十日）辭任執行董事，之後就開始放大假。除咗休息外，佢已經計劃定要抽多啲時間打高爾夫球，期望躋身高爾夫球高手行列咁話。佢本身已經係唱歌高手，加上高爾夫球可謂文武雙全。

消息話，恒生稍後會公布接替個人銀行業務主管嘅人選，但大家最關心嘅，當然係會唔會有人入董事會出任執行董事。有人就估近年晉升快過火箭嘅總經理兼財資業務及投資服務主管馮孝忠好有機會，亦有人估話唔定恒生中國行長薛關燕萍，會由非執行董事轉任執董，總之猜測就莫衷一是。