政情：周松崗終極業績交足貨
喺年底離任嘅港鐵行政總裁周松崗，尋日發表任內最後一份業績，佢仲係有備而來添！
有記者問及做港鐵CEO以來，最有成功感係乜？佢話成功就唔敢當，但隨即拎起佢上任後首次發表嘅○三年度業績報告同相關資料。佢話○四年三月發表業績，當時報告提到竹篙灣支線（現時嘅迪士尼線）、東涌旅遊吊車（昂坪360纜車）等項目嘅進度，如今已相繼落成，又不忘省靚港鐵嘅招牌，話全賴團隊百折不撓嘅毅力，仲好謙話自己其實只係貢獻一小部分，又祝願港鐵下一站前程錦繡。
周總退休後，港鐵CEO一職將由現時美國最大客運機構紐約市都會運輸局主席兼行政總裁韋達誠擔任。
至於被視為新任CEO大熱人選嘅港鐵財務總監梁國權，就喺業績發布會後話自己都支持韋達誠做港鐵CEO喎。
周松崗尋日發表任內最後一份港鐵業績，感慨良多。