政情：梁榮武捐書寸氣候逃犯
天文台助理台長梁榮武尋日出席世界宣明會舊書回收活動時，捐出一本叫做《喚醒69億隻青蛙》嘅書籍，原來所謂69億隻青蛙，正正就係指全世界所有人，諺語有云「溫水煮蛙」，呢本書就係希望所有人都正視全球暖化問題，否則最終會好似溫水中嘅青蛙，畀人煮熟都唔知。
佢仲話世界上好多領袖，處理全球暖化問題時都會抱住苟且偷安嘅心態，明明知道氣候變化勢不可當，但就硬係唔認真處理，淨係識得將責任留畀下一代。雖然佢冇指名道姓話煲呔曾係咪佢所講嘅「領袖」之一，但既然煲呔曾曾經被環保團體封為「氣候逃犯」，佢唔對號入座都唔得啦！
梁榮武藉《喚醒69億隻青蛙》呢本書寸爆多國領袖，唔知係咪包括煲呔曾呢？