政情：搞搞政：鄭慕智翻兜入航諮會

本身係律師嘅Moses鄭慕智已經夠晒忙，但對兼任公職仍然樂此不疲，政府尋日公布，委任佢做航空發展諮詢委員會成員。

咦，點解佢再作馮婦？Moses前年先卸任呢個委員會，今次翻兜再做，唔知係唔係同冇人肯幫夕陽政府手有關，佢依家同樣身兼多項公職，包括教育統籌委員會主席、財務匯報局成員、前任行政長官及政府委任官員離職後工作諮詢委員會主席、離職公務員就業申請諮詢委員會主席等，咁多公職，真係睇到都暈。

驟眼睇，政府同Moses都冇違反政府委任公職嘅「六六指引」，只不過唔好忘記，Moses有啲同政府有關嘅職位係唔當「公職」o架！好似港交所獨立非執行董事同馬灣公園諮詢委員會主席咁，並唔計算喺「六六指引」之內。單單睇Moses，就知乜嘢係能者多勞，不過夕陽政府唔聽人講嘢，幾叻嘅人幫政府都冇用喇！