政情：關愛基金缺水唐唐卸膊
煲呔曾喺舊年施政報告宣布成立關愛基金，然後卸咗畀「條條fing」嘅政務司司長唐唐負責，原先希望政府同商界各出五十億元助弱扶貧，但過咗大半年，商界只認捐咗十八億元。
據聞，有關愛基金中人見到商界募捐情況咁差都嚇咗一跳，認定大孖沙唔肯泵水嘅主因係冇credit（表彰），所以提出「名利雙收」嘅方案，即係將來有乜嘢活動都叫埋捐款人出席，等佢哋人前人後都有頭有面，但基於唔少人都認為「仇富」情緒強烈，此舉官商勾結嘅味道又太濃，為免搞出大頭佛，所以否決咗呢個建議。
既然氹唔掂啲大孖沙捐錢，關愛基金中人連中小企都唔放過，但明眼人一睇就知係煲冇米粥。若果唐唐有承擔嘅話，就唔好難為啲下屬，應該親自向大孖沙同中小企募捐，否則現有筆錢搣搣吓遲早所餘無幾，到時關愛基金想唔爛尾收場都好難囉！