劏房牆裂太心驚 官僚懶理更嚇人

正常人見過鬼會怕黑，不過港產官僚唔係正常人，塌樓砸死人唔怕，冧樹壓死人唔怕，爛招牌倒塌殺死人唔怕，佢哋天不怕、地不怕，只係怕麻煩、怕孭鑊，而呢樣正正就係港府最得人驚嘅地方之一！

官僚部門嘅行事作風點樣得人驚法呢？咁啦，不如聽聽土瓜灣街坊陳女士嘅恐怖經歷先啦。陳女士同巴基斯坦籍丈夫租住馬頭涌唐樓劏房，尋日凌晨放工返到屋企，突然聽到「啪嘞」一聲，隨即發現一塊四吋長、一吋闊嘅石屎墮下。定眼一望，嘩，唔睇猶自可，一睇嚇到傻，牆身上本來已有嘅一呎長裂縫，竟然一下子變成四呎長大裂痕，闊到連十蚊銀都楔得入！

大家應該記得，上年本港發生最慘烈塌樓慘劇，事故地點就係位於土瓜灣馬頭圍道。又係高齡舊樓，又係出現石屎剝落問題，依家牆身仲驚現大裂痕添，陳女士梗係驚到震啦，於是第一時間報警，搵政府部門幫手嘞。

嗱嗱嗱，劏房雨夜牆裂，塌樓危機湧現，固之然令人心驚，不過，更得人驚嘅仲係官僚部門嘅處事態度。屋宇署分別喺清晨同下午派員上門檢查，望咗兩眼，就斷定情況冇即時危險，叫事主自行搵業主修葺，之後就四個字：關人個關。

陳女士話，兩夫妻收入有限，想搬屋卻無能為力，惟有迫於無奈繼續居於危牆之下，與「巨痕」同眠咁話。

咦，「冇即時危險」呢五個字，大家係咪覺得好熟口熟面呢？無錯，馬頭圍道舊樓倒塌前，屋宇署巡查後又係話冇即時危險，結果就成幢樓塌晒落嚟。赤柱冧樹壓死人，康文署事前檢查過棵樹，又係話「冇即時危險」，結果導致一名女大學生香消玉殞。

仲有，年前灣仔食肆巨型招牌倒塌砸死女途人，紅磡庇護工場冧鐵閘壓死清潔女工，當局都係話出事嘅招牌同鐵閘冇問題，結果又係搞出人命。意外往往因人禍起，真係一啲都冇講錯。

前車可鑑，因為官僚部門懶懶閒，當危機冇到，卒之導致悲劇發生嘅慘痛經驗實在太多，但係從尋日呢單巨痕事件睇到，當局並冇吸取教訓，闊佬懶理、多一事不如少一事嘅官僚文化仍然盛行。唔通真係要再有死人冧樓，佢哋先至識驚？弊在到時先嚟補鑊，一切已經太遲。

總之，劏房牆裂太心驚，官僚懶理更嚇人。港產官僚見過鬼唔怕黑，係咪要見到閻羅王至會流眼淚？唔該嚴肅跟進劏房牆裂危機啦，叮！