政情：搞搞政：袁莎妮履新肥胡護花

香港總商會新任總裁、政務司司長唐英年嘅前度「得力助手」袁莎妮（Shirley）已經履新，尋日更陪同總商會主席胡定旭出席港台經濟論壇，睇尋日嘅表現，肥胡呢個老闆真係唔話得，唔單止以Shirley返工唔夠四日為由，封咗記者刁鑽提問嘅門，仲自我引爆瘀事，轉移焦點，呢一招既可以培養助手，又令雙方關係更佳，難怪Shirley全程笑咪咪啦。

Shirley尋日一襲斯文套裝現身，以前戴眼鏡嘅佢，搖身做CEO後似乎轉咗戴隱形眼鏡，望上去好精神。肥胡介紹Shirley時，不斷話大家合作愉快、而且合拍，而Shirley就繼承咗官場少說少錯嘅金科玉律，全程企喺肥胡旁邊，唔講咁多，亦冇搶肥胡嘅風頭。

一向風趣嘅肥胡一見在場傳媒時，更即場爆料，話自己普通話唔耍家，尋日要代表總商會致辭十分鐘，全程都要用普通話，搞到自己事前都有啲擔心喎；佢仲話，為咗唔想出醜人前，演講前特登搵啲普通話好嘅同事同佢一齊練習喎。