政情：鬍鬚曾廢噏自比登月英雄

港台兩地成立嘅溝通組織尋日舉行聯席會議，財政司司長曾俊華都走咗去抽水，結果又係自導自演丟架醜劇。話說呢兩個機構成立咗兩年，尋日先正式同台灣嘅策進會開第二次聯席會議，效率勁低，但鬍鬚曾似乎覺得自己好威，竟然話過去兩年嘅成果，就好似首位登月嘅美國太空人岩士唐咁，雖然係一小步，但就係兩岸人民嘅一大步。咁樣自誇自讚，真係面皮夠厚。

鬍鬚曾呢句當正自己係偉人嘅比喻發表後，尾隨發言台灣方面嘅策進會董事長林振國就講咗篇好有玄機嘅說話，佢話呢兩年係完成咗「不可能的任務」，形容台港關係就好似一場球賽咁，香港同台灣都各有入波。

言下之意，鬍鬚曾係咪即係話到現時為止，都未知邊個先係輸贏家囉。

台灣策進會多次當面邀請煲呔曾訪台，但煲呔曾仍然無回覆人哋，林振國尋日被記者問到口啞啞兼冇癮，話其實上年已經發出邀請，但嚟唔嚟都唔係台灣話到事，要由煲呔曾自己決定。