政情：萬科郁亮呻大佬唔易做
畀人叫大佬，雖然好有江湖地位，但係其中之苦就只有當事人至知。內地房地產企業萬科係龍頭之一，舊年銷售額逆市突破千億元，好多公司都夢寐以求佢哋嘅一哥地位，不過，萬科總裁郁亮尋日就話，做大佬好辛苦，一啲都唔易！
郁總話，做大佬有好多嘢要考慮，行業有問題，好多人都會去問佢，呢個時候，大佬要做到大佬嘅樣，唔可以扮調皮可愛，講嘢又唔可以亂講。講講吓，佢就以萬科今年第四次人事變動舉例，話咁又令人以為有咩問題。講到市場排名，郁總就話，有公司想超過佢哋其實都無問題，因為有對手都好過冇對手，透出一股無敵是最寂寞嘅味道。
